За шчаслівую будучыню краіны
Не маючы звычкі адкладваць на заўтра тое, што можна зрабіць сёння, ганаровы грамадзянін нашага горада, дэпутат раённага Савета дэпутатаў Валяр’ян Лявонавіч Жоль разам з жонкай Святланай Андрэеўнай першым прыйшоў 22 лютага на свой Паўднёва-Заходні ўчастак для галасавання №27, што размясціўся ў светлым і прасторным памяшканні трэцяй гарадской школы.
Патомны будаўнік, Валяр’ян Лявонавіч калісь кіраваў будаўніцтвам гэтай навучальнай установы, што ўзводзілася ўжо падчас суверэннай Беларусі. А Святлана Андрэеўна з першых дзён адкрыцця СШ №3 г. Шчучына, выкладала тут рускую мову і літаратуру, працавала намеснікам дырэктара па выхаваўчай рабоце.
Гэтыя людзі на свае вочы бачылі і бачаць, як разам з усёй краінай імкліва развіваецца наш рэгіён. На працягу 26 год В.Л. Жоль узначальваў Шчучынскую МПМК-167, а ўвогуле ў будаўнічай галіне прапрацаваў 46 год! Будучы на заслужаным адпачынку, гэты чалавек па-ранейшаму займае актыўную грамадзянскую пазіцыю.
— Як можна прапусціць важнейшую палітычную падзею года? – здзіўляецца наш суразмоўца. – Паколькі 27 лютага, у асноўны дзень рэферэндуму, у нас мяркуецца шэраг сямейных сустрэч, то вырашылі са Святланай Андрэеўнай прыйсці на галасаванне сёння. Мы аддаем свае галасы за шчаслівую будучыню нашай Беларусі. Змяненні і дапаўненні ў Канстытуцыю прадыктаваны новым узроўнем беларускага грамадства, дынамікай развіцця грамадска-палітычных і эканамічных працэсаў. Упэўнены, адноўлены Асноўны Закон будзе садзейнічаць захаванню міра і стабільнасці ў нашай краіне, умацаванню сацыяльнай справядлівасці і народаўладдзя, гарантыі захавання сям’і і традыцыйных каштоўнасцей, вернасці нашай гістарычнай памяці.
— Дый магія “люстэркавых лічбаў”, калі ў даце сышліся ажно шэсць двоек, дыктуе зрабіць сёння штосьці лёсавызначальнае, — усміхаецца Святлана Андрэеўна. – Запомніцца гэты дзень назаўжды. Будзем расказваць пра яго сваім унукам — іх у нас чацвёра. Вельмі хочацца, каб жылі яны ў мірнай, свабоднай, заможнай краіне, дзе ёсць перспектывы для моладзі.
Да пачатку галасавання на Паўднёва-Заходнім участку №27 усё было гатова.
— Усе 11 членаў камісіі прыбылі сёння на ўчастак для галасавання ў 9.30, публічна, у прысутнасці назіральнікаў, апламбавалі скрыню для бюлетэняў. Роўна ў дзесяць сталі прымаць першых выбаршчыкаў, — гаворыць старшыня ўчастковай камісіі Валянціна Мілінкевіч.
Члены камісіі сустракалі шчучынцаў прыветна і добразычліва, хутка адшуквалі ў спісах прозвішча жадаючага прагаласаваць, звяралі дадзеныя з пашпартнымі, пад асабісты подпіс уручалі бюлетэнь. Людзі заходзілі ў кабінкі для галасавання, каб афіцыйна зафіксаваць свой выбар.
Апусціла ў ўрну свае бюлетэні супружная пара Жоль.
— Абавязкова трэба прыйсці на рэферэндум і прагаласаваць за будучыню сваёй краіны, сваіх дзяцей і ўнукаў. Няхай яна будзе шчаслівай і мірнай, — пажадалі Валяр’ян Лявонавіч і Святлана Андрэеўна.
Таццяна СТУПАКЕВІЧ.
Фота Аляксандра КАСПЕРЧУКА.